Parte na kan historya an natapos na kampanya ni Alex Eala sa Wimbledon Championships.
Nagpaaram na si Eala sa grass courts kan Wimbledon asin naglalaom na liwat ining mabwelta sa masundo na taon.
Kaya man masentro na an atensiyon kaini sa hard court season kun saen target kaining makalaog nin awtomatiko sa main draw kan prestihiyosong US Open sa New York na ikukundusir sa Agosto.
Pupuonan ni Eala an hard court campaign kaini sa pagsabak sa W1000 National Bank Open na ikukundusir man sa Hulyo 26 hasta Agosto 7 sa Montreal, Canada.
Bigatin an torneong ini na papartisiparan kan darakulang tennis players sa kinaban kabali na an Top 4 players na sinda Aryna Sabalenka kan Belarus, Coco Gauff kan Amerika, Jessica Pegula kan Amerika asin Iga Swiatek kan Poland.
Mawot ni Eala na masunudan an impresibong kampanya kaini sa Miami Open kasuarin sana kun saen tolong Grand Slam champions an pinataob kaini kabali na si Swiatek.
Pigdaog man ni Eala sinda reigning Australian Open champion Madison Keys kan Amerika asin Jalena Ostapenko ng Latvia.
Kun magpapadagos an pag-angat ni Eala sa WTA rankings, posibleng liwat ining makakua nin awtomatikong tiket sa main draw kan US Open na isasagibo man puon Agosto 24 hasta Setyembre 7 sa Queens New York.
Presenteng nasa No. 56 si Eala sa actual WTA rankings. Tuod na si Eala sa hard court.
Sa katotoohan, igwa ini nin US Open juniors title kan 2022.
