NAGA CITY- Dakulang tabang sa pag-abiso sa komunidad tuyong igwang kalamidad an pagkakaigwa nin Early Warning Device.
Sa entrevista kan Bombo Radyo Naga ki Arnel Ama, Barangay Kagawad kan Balogo Pasacao, sinaysay kaini na dae na ninda kaipuhan pang mag-ikot sa kada zona tuyong igwang kalamidad nin huli ta maaraman tolos kan mga tawo enkaso igwang papaabuton na raot kan panahon sa paagi kan pagtanog kan sirena.
Sigun ki Ama, dangog ini sa kasentruhan kan saindang barangay apwera sa nagkapirang lugar.
Dugang pa kan opisyal, nagigin alerto an publiko sa paagi kan Early Warning Device na ini sa mga posibleng huma sa buhay o mga peligro dara kan manlaen-laen na kalamidad na posibleng magtama.
Nagseserbe ining pagirumdom asin tanda na magpreparar an publiko tanganing malikayan an anuman na klase kan insidente.
Mientrastanto, apwera sa nasambitan ng sistema, yaon man an padagos na pagkundusir nin mga drill siring kan earthquake drill, pagsanay sa mga residente kun ano an gigibuhon enkaso igwang kalamidad na magtama asin mga pagirumdom na magagamit sa panahon kan pangangaipuhan.
An gabos na lakdang na ini, obheto na gibuhong salbado an komunidad sa panahon kan manlaen-laen na emerhensiya.
Sa ngunyan, hagad na sana kaini na padagos na makipagtabangan an saindang mga nasasakupan para sa mas marhay na implementasyon kan mga programa sa saindang lugar.
