Pigsierto ni House Appropriations Committee Chairperson Rep. Mikaela Suansing na an sektor kan edukasyon an nakaresiber nin pinakadakulang parte kan pondo sa irarom kan propwestong 2026 General Appropriations Bill (GAB).
Sigun ki Suansing, apwera sa edukasyon, pigtawang-prayoridad man kan Kamara an sektor kan salud asin agrikultura.
Sa sarong press conference ngunyan na aldaw, inihayag kan lehislador na gikan sa P255.5 bilyong pondo kan Department of Public Works and Highways (DPWH), liwat na pigtagamang pondo sa mga pangenot na sektor siring kan edukasyon, salud, asin agrikultura.
Basado sa datos, nasa 78.7% kan P255.5 bilyon o katampad kan P201.1 bilyon an pigtagama sa tulong pangenot na sektor. Gikan digde, P56.64 bilyon an mapapasiring sa edukasyon, mantang tig-P53.75 bilyon man an pigtagama para sa agrikultura asin salud.
Mientrastanto, an natatadang parte kan pondo gikan sa flood control projects kan DPWH an pigtagama para sa manlaen-laeng ahensya kan gobyerno siring kan DOLE, DSWD, DOTr, DND, DOJ, DENR, DOF, DICT, DOE, Judiciary, Ombudsman, COA, NSC, National Commission on Senior Citizens, Local Government Support Fund (LGSF), COMELEC, DMW, DHSUD, asin DILG.
Sigun ki Suansing, nagpakol sa P1.28 trilyon an kabilugang alokasyon para sa sektor kan edukasyon sa irarom kan 2026 national budget, na iyong pinakadakula sa gabos kan sektor.
Sinundan ini kan health sector na may P411.2 bilyon, mantang an agriculture sector man iyo an may kabilugang P292.9 bilyong alokasyon.
Apwera kaini, nagtagama man an Kongreso kan P32.8 bilyon para sa Assistance to Individuals in Crisis Situations (AICS) asin iba pang social programs kan gobyerno.
Pig orgulyo man ni Suansing na nagtagama an gobyerno nin P7.82 bilyon para sa pagbabayad nin mga kakulangan sa pondo kan mga State Universities and Colleges (SUCs).
Mapakol sa 114 SUCs an makikinabang sa pondong ini. Nilinaw man ni Suansing na mayong pigtagama na pondo para sa unprogrammed appropriations sa irarom kan 2026 national budget. Soboot, kun mayong dugang na kita an gobyerno, mayong mapopondohan sa unprogrammed appropriations.
