DAKULANG pakinabang sa haros duwang ribong mga paraoma sa banwaan nin Bula asin Minalabac, Camarines Sur an Solar Panel Irrigation Program kan National Irrigation Administration Bicol huli sa nagin salbado an mga ini sa bulanang bayadan sa kuryente na kun minsan nagin zero balance pa, kaya dakulang kabawasan ini sa pondo kan saindang kooperatiba.
Sa Bula an mga nabinibisyaran kan siring na programa iyo an San Agustin, San Ramon Agrarian Reform Farmers Cooperative na may sakop na 591 na ektarya nin irrigation farms na pagsasadiri man nin nasa 722 na mga paraoma.
Mantang sa Minalabac an mga nabenipisyaran iyo an Mataoroc, San Jose, Sagrada Familia asin Baliuag Viejo na may 1,255 na ektarya asin 1,132 na mga paraoma.
Sigun ki Ma. Cleofe Baraero, relations officer, sinabi kaini na plano ninda na palawakon pa an programang ini sa Camarines Sur asin magin sa ibang parte kan Bicol Region. Kaipuhan sana soboot na pagprepararan an bagay na ini orog na sa pag-allocate kan pondo.
May mga nagbisita sa sainda na hali sa NIA Region 12 tanganing hilingon an nasambitan ng mga lugar para naman sa posibleng pagpapautob kan kaprehong programa sa saindang mga paraoma.
