NAGA CITY- Nagluwas nin kulog boot an election officer kan Commission on Election (COMELEC) Bato huli sa mga basa suboot na balota na hale sa apat na mga voting precinct sa nasambitang banwaan.
Sa ekslusibong entrevista kan Bombo Radyo Naga ki Alex Escape, election officer kan COMELEC sa banwaan nin Bato, Camarines Sur, dae na kaini nalikayan na magluwas nin kulog boot huli sa man-ibong-ibong na alegasyon na nagkaigwa suboot nin darayaan kan 2016 Vice Presidential Race sa saindang banwaan.
Sigon ki Escape, makamundo na isipon na an mga election officer an pirming binabasol kapag igwa nin alegasyon nin darayaan sa sarong lugar.
Tinawan doon pa kaini na sa laog kan saiyang 27 taon na pagigin election officer, kompyansa suboot siyang nagin malinig asin mayong nangyaring darayaan kan nakaaging pirilian.
Sinaysay pa ni Escape na labi an nagin pag-lilikay sa mga ballot boxes na ginamit kan nakaaging May 2016 elections kun kaya dae ninda maaraman kun pano nabasa an mga balota na hale sa apat na mga voting precinct.
Mientrastanto, sa suway na entrevista kan Bombo Radyo Naga ki Georgina Hernandez, tagapagtaram ni Vice President Leni Robredo, sinaysay kaini na mayong mga bago sa mga sahot na pigbubutasan kan lado ni dating senador Bongbong Marcos asin nagluluwas na anas mga alegasyon sana ini huli ta mayo suboot ining maipahiling na ebidensya na makakapagsuporta sa saindang mga sahot.
Dugang pa kaini, parte sana ini kan ginigibong mind conditioning kan lado kan dating senador para mapatubod an publiko na nagkaigwa nin darayaan kan 2016 Vice Presidential Race.
