Nakikipagkoordinar na an composite team kan Philippine Embassy sa Yangon, Myanmar sa local officials para sa pagkumpirmar kan pagkakabistuhan kan mga naisalbar o narekober na mga dayuhan gikan sa nagrasay na Sky Villa Building makalihis an pagtama kan magnitude 7.7 na linog kan nakalihis na aldaw nin Biyernes, Marso 28.
Sa sarong statement, sinabi kan Embahada na nakipag-koordinar an PH composite team sa mga opisyal na namamayo sa search and rescue operations sa site siringpaman sa mga opisyal kan Mandalay General Hospital.
Alagad sa ngunyan, dae pa natutukoy an mga naisalbar o narekober na bangkay na igwa nin kinaraman sa 4 na Pilipinong pinagtutubudang nasa nagrasay na establisyemento.
Nakihilingan man an grupo sa iba pang 11 Pilipinong survivor gikan sa building tangani makakalap pa nin mas kadakolon na impormasyon.
Padagos man an pakikipagkoordinar kan Embahada sa mga otoridad duman asin man ginigibo an gabos nin paagi tangani masiguro an salbadong kamugtakan kan mga Pilipino.
Naenot na nang nag abot an composite team kan Embahada kan nakalihis na banggi nin Lunes sa Mandalay, harani sa episentro kan linog tangani magtabang sa paghahanap sa nawawarang apat na Pilipino.
Pig abisuhan man kan Embahada an mga Pilipino sa Mandalay na pwede sindang mag apod sa Assistance to Nationals (ATN) hotline tangani matawan nin kaukulang tabang o makipag-koordinar sa mga Filipino coordinators.
