Pigbuyagyag ni dating Department of Public Works and Highways (DPWH) Undersecretary Roberto Bernardo an soboot pagtatao kan komisyon sa pirang lehislador sa mga flood control projects.
Ginibo ni Bernardo an pagsisiwalat sa pagpapadagos kan pagdangog kan Senate Blue Ribbon Committee ngunyan na aldaw.
Sigun ki Bernardo, 20% kan P800 milyon, katampad kan poco mas o menos P160 milyones an pigdeliver ki Meynardo, na soboot para ki Senador Chiz Escudero.
Apwera ki Escudero, pinangaranan pa kaini si dating Senador Bong Revilla, Senador Nancy Binay, asin Ako Bicol Party-list Rep. Zaldy Co na imbwelto sa soboot anomalya.
Sa kaparehas na hearing, tahasang pig-ako ni Bernardo an pagkaimbwelto sa iregularidad sa nagkapirang flood control projects.
Dugang pa kaini, preparado ining gibuhon an gabos tanganing maitama an saiyang kasalanan asin dae na liwat pang mautro.
Makalihis an pagbuyagyag, nagsunad si Bernardo nin aplikasyon sa Witness Protection Program kan Department of Justice.
Naghagad si Justice Secretary Jesus Crispin Remulla sa komite na tugutan ining darahon si Bernardo sa DOJ para sa mahigot na eksaminasyon kan saiyang testimonya, na tolos na itinao kan komite.
