Pigbuyagyag ni dating Department of Public Works and Highways (DPWH) Undersecretary Roberto Bernardo an soboot pagtatao nin komisyon sa nagkapirang lehislador gikan sa mga proyekto kan flood control.
Ginibo ini sa pagpapadagos kan pagdangog kan Senate Blue Ribbon Committee kan nakalihis na Huwebes nin pagkaaga. Sigun ki Bernardo, naghatod ini nin 20% gikan sa P800 milyon, katampad kan poco mas o menos P160 milyon ki Meynardo, na soboot para ki Senador Chiz Escudero.
Apwera ki Escudero, binanggit man kaini sinda dating Senador Bong Revilla, Senador Nancy Binay, asin Ako Bicol Party-list Rep. Zaldy Co komo mga imbwelto sa soboot anomalya.
Sa parehong pagdangog, tahasang inamin ni Bernardo an saiyang pagkakaimbwelto sa mga iregularidad sa nagkapirang proyekto kan flood control.
Dugang pa kaini, andam ining gibuhon an gabos tangani maitama an saiyang pagkakasala asin maiwasan an pag-uutro kaini.
Makalihis an saiyang pag-amin, nagsunad si Bernardo nin aplikasyon sa Witness Protection Program kan Department of Justice.
Hinagad ni Justice Secretary Jesus Crispin Remulla sa komite na tugutan ining darahon si Bernardo sa DOJ para sa masusing pagsusuri kan saiyang testimonya, na tulos man tinugutan kan komite.
