Pighurot ni Senate President Pro Tempore Ping Lacson na dae pa lusot sinda Senators Jinggoy Estrada asin Joel Villanueva sa isyu kan budget insertions.
Pigtawan duon ni Lacson, na pwedeng “selective” an memorya kan nagdawit sa sainda, alagad bakong buot sabihon kaini lusot na sinda sa urulay kan milyong pisong insertions sa General Appropriations Acts (GAAs) para sa 2023 asin 2025.
Sinabi kan senador na nakua an P600 milyon na nakatagama soboot para sa flood control projects sa Bulacan sa unprogrammed funds kan 2023 GAA, na pigkokonektar ni Hernandez ki Villanueva.
Pinahimutikan ni Villanueva an alegasyon. Sigun ki Lacson, an P600 milyon an nahiling sa dokumentong gikan ki Senador Sherwin Gatchalian.
Sa pagdangog kan Blue Ribbon Committee, pigtukdo ni Hernandez na an soboot flood control projects ni Villanueva an gikan sa unprogrammed funds sa 2023 GAA.
Naenot nang sinabi ni Lacson na may P355 milyon na infrastructure projects sa Bulacan na pigkokonektar ni Hernandez ki Sen. Jinggoy Estrada an nahiling sa 2025 GAA. Pinahimutikan man ni Estrada an alegasyon.
Saysay pa ni Lacson, pigtugutan kaining mag atendir an duwang senador sa pagdangog nin huli ta ini an sarong pangenot na karapatan kan siisay man na atubangon an nag-aakusar sa sainda. Dugang pa ni Lacson, an kada indibidwal, ordinaryo man o senador, igwa nin pantay na karapatan.
Kinonsulta man kaini an saiyang legal staff antes maggibo nin desisyon na tugutan sindang mag atendir. Sa ibong na banda, dae pa man nalinig an duwang senador sa isyu kan budget insertions sa irarom kan 2023 asin 2025 GAA.
