Inihayag ni Ombudsman Jesus Crispin ‘Boying’ Remulla na kaibahan si former House Speaker Martin Romualdez sa mga papanimbagon dapitv sa flood control projects anomaly.
Nagtutubod kaya an nasambitan ng opisyal na dae lusot sa paninimbagan si Leyte 1st District Rep. Romualdez katakod sa isyu kan korapsiyon.
Hurot ni Ombudsman Remulla na an pagigin ‘speaker of the house’ ni Romualdez an nahihilingan na rason tanganing ini an magkaigwa nin paninimbagan sa pagkakatalaga ni former Ako Bicol Party-list Rep. Zaldy Co komo House Appropriations Committee chair.
Alinsunod ini sa isinasagibong imbestigasyon kan Office of the Ombudsman sa nagin papel kan dating lehislador sa kalakaran kan maanomalyang mga proyekto.
Huli digde, pagsierto ni Ombudsman Remulla na magibo sinda nin mga dugang na lakdang tangani sanang matukoy an bilog na katotohanan sa likod kan flood control scandal.
Saiyang pigtawan-duon na mayong papalusuton digde orog na an mga lider o opisyal kan gobyerno sa nagin kalakaran kan katiwalian.Kun kaya posibleng kahampangon ni former House Speaker Martin Romualdez an kasong ‘gross inexcusable negligence’ enkaso matukoy kan Ombudsman an paninimbagan kaini.
Mientrastanto, ipigheras man kan presenteng Ombudsman na nagpapadagos pa man an saindang imbestigasyon katakod sa pagkaka-imbwelto ni Sen. Chiz Escudero sa maanomalyang mga proyekto.
Sinundan kaini an nakalap na money trail na posibleng magin dalan tanganing matukoy an pagkakadawit kan senador.
Pati sa mga salaysay dapit sa flood control projects scandal, sainda soboot gagamiton komo ebidensiya na iyong pigsusuri na ngunyan kan Ombudsman.
