NAGA CITY- Pigklaro ngonyan kan lado ni dating Senador Ferdinand ‘Bongbong’ Marcos na mayong anumang kasuguan hale sa Supreme Court (SC) an saidang pigbalgar makalihis na magtao ini nin pahayag suodma manungod sa mga nadiskobreng basang balota hale sa apat suboot na mga voting precinct sa Bato, Camarines Sur.
Sa ekslusibong entrevista kan Bombo Radyo Naga ki Atty. Vic Rodriguez, legal counsel asin tagapagtaram kan dating senador, tinawan doon kaini na mayong ipinaluwas na gag order an Korte Suprema na nagtitindog komo Presidential Electoral Tribunal (PET) manungod sa electoral protest na pigsunad ni Marcos kontra sa pigpapalakop suboot kan lado ni Vice President Leni Robredo.
Sigon saiya, sarong resolusyon an ipinaluwas kan PET para ipagirumdom an ‘sub judice rule’ kun saen pigpapangalad suboot an duwang lado na tukaron an dawa na anong merito kan electoral protest huli ta pigdadangog pa ini sa korte, ini para malikayan an pagkakaigwa nin public opinion manungod digdi.
Hurot ni Rodriguez, sarong factual reporting an ginibo ni Marcos suodma kun saen pigbuyagyag sana kaini an mga nadiskobreng iregularidad sa enot na aldaw kan manual recount arog na kan nawawarang mga audit logs, raraot na mga ballot boxes asin basang mga balota kun kaya dae suboot ini sakop kan’sub judice rule’.
Mientrastanto, sigon ki Rodriguez, tinutugutan soboot kan PET na magpasiring asin mag-observe si Marcos sa revision area urog na ta ini an protestant kan electoral protest alagad, mahigot na pigpapangalad suboot an pagkapot sa mga balota asin pangingiaram sa manlaen-laen pang ginigibo sa mga revision committee tables.
Enot kaini, sinaysay kan lado kan bise presidente na dapat na matukar sa PET an binutasang mga pahayag ni Marcos para mahiling man kun igwang nangyaring pagbalgar sa ipinaluwas na gag order kan Korte Suprema sa duwang lado.
