Nangapudan an Solid Waste Management Office Naga sa mga barangay officials asin iba pang mga lokal na opisina na makipagtabangan sa sainda sa pagmantinir kan kalinigan kan siyudad asin pagtaraid na banwaan.
Sigun ki Joel Martin, pamayo kan Solid Waste Management Office Naga, sinaysay kaini na kinakaipuhan an pagtarabangan kan gabos tanganing mamanehar an pag-apon kan basura asin magkaigwa nin komprehensibong lakdang dapit digde.
Sigun pa ki Martin, huli sa kawaran nin disiplina kan mga nagkapirang tawo nagkukuriyat an basura na nakakaapektar nin dakula sa kapalibutan orog na ngunyan na nakakaeksperyensiya nin pag-uuran asin pagbaha an pirang lugar sa nasyon.
Marurumduman, enot nang nagluwas na saro sa mga rason kan baradong kanal, drainage asin iba pang waterways an huli sa mga basura na yaon digde na gikan man sa mga tawo.
Kaipuhan soboot an proper waste management tanganing malikayan an darakulang problema na kawsa kan mga basura.
Siringman, nagdakol nin 20 porsyento an nakokolektar na basura sa siyudad Naga sa tala kan Solid Waste Management Office.
Sa ngunyan, pigsierto kan opisyal na saindang paglalapigutan sa tabang kan LGU-Naga na madugangan pa an garbage truck asin iba pang ekipahe kan SWMO tangani dae mamroblema sa sistema kan koleksyon.
