NAGA CITY- Prangkang sinaysay ni Naga City Vice Mayor Nelson Legacion na garu kabale sa mga nauugma ngonyan urog na sa nangyayaring panraraot ki Vice President Leni Robredo si dating Sen. Ferdinand ‘Bongbong’ Marcos Jr. na dati kaining nakalaban sa Vice Presidential race.
Sigon ki Legacion, apwera sa mga author na yaon sa likod kan social media account na nagpapalakop kan mga salang impormasyon, garu labi man suboot an kaugmahan ni Marcos huli sa pagkakabaranga kan ciudad nin Naga huli naman sa #Nagaleaks.
Posibleng iniisip suboot kan dating senador na nababanga naman an mga Nagueño urog na an mga nagsusuporta sa bise presidente huli sa nasambitang mga controversial post.
Mientrastanto, sa suway man na entrevista sa tagapagtaram kan bise presidente na si Georgina Hernandez, sinaysay kaini na dae na ipapasipara kan opisyal an ginigibong panraraot sa saiyang pamilya siring man sa saiyang depuntong esposo.
Katakod kaini, magkakaigwa nin prayer rally sa ciudad nin Naga atyan na hapon tanganing ipaglaban an diretsos kan mga Nagueños na nararaot na suboot huli sa mga salang impormasyon na naglalakop sa social media sites.
Marurumduman na nakapalaman sa #NagaLeaks an suboot mga kurapsyon asin iba pang mga akusasyon ki depuntong Department of Interior and Local Government (DILG) Sec. Jesse Robredo siring man sa bise presidente.
Naikonektar naman sa nasambitang post an mga pangaran ninda Camarines Sur third district Rep. Gabby Bordado, Naga City First Lady Farrah Bongat asin iba pang mga hararaning amigo asin tagasuporta kan pamilya Robredo.
