Iginiit ni former Senator Antonio Trillanes IV na posibleng lumabag sa batas ng Rome Statute ang isinapubliko ng 18-dating sundalo ang ilang impormasyon tungkol sa operasyon ng International Criminal Court.
Ayon kay Trillanes, nilabag ng grupo kasama ang kanilang abogado na si Atty. Levito Baligod ang Article 70 ng Rome Statute, na sumasaklaw sa mga pagkakasala laban sa pangangasiwa ng katarungan o “administration of justice.” Kabilang sa mga paglabag dito ang pagpigil o obstruction at pananakot sa mga testigo at opisyal ng International Criminal Court.
Aniya, maaring ituring na “obstruction of justice” ang pagkakalantad ng ilang impormasyon na may kinalaman sa operasyon ng International Tribunal. Dahil dito, nalagay sa peligro ang mga imbestigador at mga testigo, lalo na’t naibunyag sa publiko ang kanilang pagkakakilanlan at pangalan sa joint-affidavit ng 18-dating sundalo.
Nilinaw ni Trillanes na ang ginawang pagbabantay ng grupo sa mga tauhan ng International Tribunal, kung totoo man, ay hindi labag sa batas at hindi maituturing na krimen.
Kanyang itinanggi rin ang alegasyon na tumanggap sila ng 2-milyong dolyar upang tulungan o asistehin ang mga imbestigador habang nasa bansa. Aniya, “hindi porket totoo ang ilang bahagi ng kanilang salaysay ay ibig sabihi’y may katotohanan ang kabuuan nito.”
Ang pahayag ni Trillanes ay nagpapakita ng matinding pagtutol sa publiko sa ginawang paglabas ng sensitibong impormasyon ng grupo, na ayon sa kanya ay maaaring magdulot ng panganib sa imbestigasyon at seguridad ng mga kasangkot sa International Criminal Court.
