Aram baya nindo mga ka-bombo, sarong factory worker sa Khanty-Mansiysk sa Russia an pigsunadan nin kaso kan saiyang kompanya makalihis na magsayuma na ibalik an nasa labi 7 million rubles o $87,000 na aksidenteng naitao sa saiya huli sa soboot software glitch.
Susog sa report, kan makareseber nin notification gikan sa saiyang banking app sa enot na parte kan taon si Vladimir Rychagov labi soboot an saiyang kakilhagan.
Apwera kaya sa 46,954 rubles o $581 na bayad para sa saiyang bakasyon nakareseber pa ini nin mega-bonus na 7,112,254 rubles o $87,000.
Igwa soboot huruding-huding gikan sa saiyang mga katrabaho na an factory na saindang pinagtatrabuhan nagpepreparar para sa saindang bonus.
Alagad an kaogmahan ni Vladimir an halipot sana man kan liwat ining makareseber nin apod gikan sa accounting department asin digde na napag-araman na napasala sa pag-transfer an kompanya asin kaipuhan na ibalik ni Vladimir an saiyang nakua.
Sigun sa lalaki, makalihis na magsagibo nin research online, nagdesisyon soboot ini na dae ibalik an kwarta.
Susog man sa dokumentos na pigsumiter kan kompanyang pinagtatrabuhan ni Vladimir, an kwarta an para sa sweldo kan nasa 34 na obrero sa manlaen-laen na branch.
Katakod kaini, pigdara sa korte an reklamo kan kompaya kun saen susog sa kasuguan kaipuhan na ibalik ni Vladimir an kwarta huli ta an 7 million ruble na nareseber kaini an dae maikokonsederar na sweldo alagad padagos man an pagsayuma kan nasambitan ng lalaki.
Sa ngunyan, nagpapadagos an pagdangog dapit sa nasambitan ng kaso asin pigsierto kan kompanya na maibabalik sa sainda an kwarta para sa kapakanan kan mga tawong dapat na makareseber kaini.
