NAGA CITY- Prangkang sinaysay ni Magdalo Partylist Rep. Gary Alejano na ‘wishful’ thinking an pahayag kan nagkapirang mga lehislador na an federalismo an maserbeng solusyon sa mga problema sa nasyon urog na sa parte kan Mindanao.
Sa entrevista kan Bombo Radyo Naga sa kongresista, sinaysay kaini na mayong ebidensya na makakapagpatotoo na masosolusyunan an mga problema kan Pilipinas kun madadagos na maging federal government na an sistema kaini.
Posible suboot na huli sa federalismo, mas magkakaigwa pa nin pagkakabaranga sa Pilipinas komo sarong nasyon.
Sigon pa ki Alejano, posibleng mas magtios pa an nagkapirang mga lokal na gobyerno na yaon sa Visayas asin Mindanao urog pa kun dae na an mga ini matatawan nin revenue waste hale sa mga darakulang ciudad asin lugar sa nasyon arog na sana kan National Capital Region.
Sa hiling man ni Alejano, solamenteng an region 3, 4 asin NCR sana an igwa nin kapabilidad para i-sustain an sarong federal state government.
