Nagsapo nin technical knockout (TKO) si Filipino MMA fighter Fritz Biagtan sa kamot ni South African striker Edson Machavane.
Sa paghampang kan duwa sa irarom kan Flyweight Division kan One Championship, dae nakabawi an Filipino fighter makalihis ining magsapo nin hararom na lugad sa saiyang noo sa ikaduwang round, paagi tanganing dagusan nang papunduhon an laban.
Nagtama kaya sa toong siko ni Machavane sa noo ni Biagtan asin sa laog sana kan pirang segundo, duguan na an saiyang lawgon.
Mawot pa kuta kan Pinoy fighter na idagos an laban alagad nagdesisyon na an official doctor kan One Championship na dagusan ining papunduhon, 35 secs sana puon kan magpuon an ikaduwang round.
An pagkadaog ni Biagtan an ikaduwa na sa saiyang karera komo professional MMA fighter sa One Championship, mantang nagtitinir sa tolong laban an saiyang naipagana.
Sa tolong laban na ini, duwa an nagibo kaining ipagana sa paagi kan knockout.
Sa kampo man ni Machavane, ini an saiyang enot na kapangganahan sa irarom kan One Championship.
Ginanap an laban kan duwa sa Lumpinee Boxing Stadium sa Bankok, Thailand, an nagsirbing sentro kan Muay Thai sa nasambitan ng nasyon.
