Nagluwas nin abiso an Department of Foreign Affairs (DFA) para sa mga Pilipinong nurse na naghahanap nin trabaho sa New Zealand na mag-likay nin huli ta sa presente mayong trabaho na pig-aalok para sa foreign nurses o Internationally Qualified Nurses (IQNs).
An nasambitan ng patanid an naggikan sa Embahada kan Pilipinas sa Wellington, New Zealand makaihis mapag-araman na igwa nin pirang mga indibidwal asin mga agency na nag-aalok na mag-facilitate sa pag-hire nin mga dayuhang nurses sa paagi kan pag-asikaso kan saindang biyahe pasiring New Zealand gamit an visitor visa tanganing makakua nin Comprehensive Assessment Program (CAP) o Objective Structured Clinical Examination (OSCE) para sa mga nurse asin makapag-apply kalaunan para sa registration kan Nursing Council of New Zealand.
Piglinaw kan DFA na dawa ngani lehitimong pagsasadiri an pagkua nin siring na eksaminasyon tanganing mag-practice nin nursing sa New Zealand, dai man suboot ini naggagarantiya nin trabaho huli ta nakadepende suboot ini sa manlaen-laen na bagay siring kan local demand sa mga nurses asin an kakayahan kan mga among sa sektor nin salud na mag-hire.
Susog sa embahada, nakaresibe sinda nin mga report na igwang mga Internationally Qualified Nurses na nagbiyahe pasiring sa New Zealand gamit an visitor visa na pirit na pinahale sa nasyon kan mag-expire an saindang mga visa huli ta dai sinda nakahanap nin trabaho huli sa kakulangan nin mga oportunidad sa trabaho.
Katakod kaini, nangapudan an Embahada sa mga Filipinong nurses na siguraduhon na igwa sinda nin trabaho na malaogan sa nasambitan ng nasyon na antes maghali sa Pilipinas, kabali na an lehitimong job offer na may verified contract hale sa accredited employer asin katampad na working visa na pig-isyu kan New Zealand Immigration.
