Ipinahayag ni United States Defense Secretary Pete Hegseth na magigin bukas sa publiko asin ipapahiling sa livestream an pagpapatupad kan parusang bitay kontra sa dating US Army psychiatrist na si Nidal Hasan, na nagkagadan nin 13 katawo sa Fort Hood military base kan 2009.
Gagibohon an execution sa paagi kan firing squad sa Disyembre 3, alas 1:00 nin hapon (US Central Time), sa mismong Fort Hood sa Texas, na iyo man an eksaktong oras asin lugar kan nangyari an pamamaril.
Idinepensa ni Hegseth an desisyon asin sinabing dapat mahiling kan publiko an proseso tanganing maipahiling an grabeng konsekwensya kan mga siring na krimen, matapos aprubaran ni Presidente Donald Trump an paggamit kan firing squad.
Nahatulan nin parusang kagadanan si Hasan kan 2013 huli sa 45 bilang nin premeditated murder asin attempted murder matapos siyang mamaril sa laog kan pasilidad nin militar mantang nagsisigaw nin “Allahu akbar.”
Ini an pinakaenot na pagkakataon sa kasaysayan kan Estados Unidos na isasapubliko sa telebisyon o online an sarong pederal o militar na execution, mantang huri nang ginamit kan US military an firing squad para sa parusang bitay kan 1945.
