(UPDATE) NAGA CITY- Garu naghuma an first lady ni Naga City Mayor John Bongat na si Farah Bongat sa mga yaon sa likod kan sarong facebook page makalihis na ikonektar an saiyang pangaran sa nagkakalat na #NagaLeaks na nanraraot sa pamilya Robredo.
Sigon sa post ni Bongat sa saiyang facebook account, sinaysay kaini na mawot niyang mahiling an admin na yaon sa likod kan sarong facebook page na nagkokonektar asin nagsasabing siya an yaon sa likod kan nagkakalat na panraraot ngonyan ki Vice President Leni Robredo asin sa depunto kaining esposo na si dating Department of Interior and Local Government (DILG) Sec. Jesse Robredo.
Posibleng mahampang suboot sa kasong cybecrime an yaon sa likod kan nasambitang panraraot sa first lady.
Sigon ki Bongat, nakatalaan siyang magpasiring sa opisina kan National Bureau of Investigation (NBI) sa Lunes para sa saiyang sunod na lakdang manungod sa nasambitang isyu.
Enot pa kaini, nakonektar an pangaran ni Bongat sa sinasabing #NagaLeaks makalihis an saiyang maiinit na pahayag na garu pigtutumbok suboot si Vice President Robredo makalihis an pagtama kan bagyong Nina sa ciudad nin Naga.
