NAGA CITY – Kadakol na mga sira an nagadan makalihis aksidenteng mag-leak soboot an ammonia gikan sa sarong kumpanya sa Barangay Sagurong Pili, Camarines Sur.
Sa entrevista kan Bombo Radyo Naga ki Kapitan Romeo Plegino, sinaysay kaini na nakubanan na sana an mga residentes sa saindang lugar kan masangab an mabatang parong kan kemikal na gikan sa Polytrade, sarong manufacturer asin distributor nin purified ice asin mga manok sa lugar.
Napag-araman na aksidenteng nagkaproblema an saro sa mga pipeline kunsaen digdi nagsangaw an ammonia na pigagamit komo pampatagas kan yelo kan nasambitan ng kumpanya.
Katakod kaini, sigon sa Kapitan, nagkaigwa pa nin komosyon makaihis lusubon kan mga residente an kumpanya mantang igwa pa nin darang mga patarom alagad tulos man na napakalma.
Dugang pa kan opisyal, tulos man niyang kinaulay an saro sa mga manager kan kumpanya asin pinagirumduman na dae ipag-discharge an tubig na may kemikal sa Binasagan River alagad sa ibong kan pag-uyon kaini, sa salog man giraray ibinagsak an mga kemikal.
Katakod kaini, kadakol na mga tilapia an nagadan sa pangyayari.
Sa ngunian, hagad kan opisyal na maimbestigaran kan mga otoridad an insidente nganeng masusog kung siisay an igwa nin paninimbagan sa nangyari.
