Pigbuyagyag ni dating Presidente asin Pampanga Rep. Gloria Macapagal-Arroyo na igwanh pagporbar na pagtagama nin dakulang kantidad para sa flood control projects sa ikaduwang distrito kan Pampanga sa irarom kan House General Appropriations Bill ( GAB).
Sa tahaw kan deliberasyon kan committee amendments, napag-araman nindang bako sinda an naglaog kan nasambitan ng alokasyon.
Tulos sindang nagpasalamat sa House Committee on Appropriations sa paghali kan pondo sa opisyal na committee report.
An insidente an naglataw sa tahaw kan mas mahewas na isyu kan realignment kan P255.5 bilyong flood control funds kan DPWH, na pig-iimbestigaran huli sa alegasyon kan ghost projects asin bakong makatarungang alokasyon.
Sigun sa mga report, igwang nagkapirang distrito na nakaresebir nin sobrang pondo maski dae labing apektado kan pagbaha.
Nangapodan an nagkapirang lehislador nin mas mahigot na auditing asin transparency sa pagtatagama nin pondo kan bayan.
Padagos an pagsusuri kan Kamara tanganing masierto na an flood control budget an mapapasiring sana sa mga lugar na tunay na nangangaipuhan.
