Nakatalaan na mapoonan nin banggi sa kaenot-enoting pagkakataon an Fluvial Procession huli sa low tide na Naga River.
Sa entrevista kan Bombo Radyo Naga ki PLTCOL. Elmer Azurez Jr., Chief, City Community Affairs and Development Unit, Naga City Police Office, sinabi kaini na na sarong road closure an iimplementar poon 1:00 nin hapon, sa mga tinampo na aagihan kan Foot Procession. Base sa anunsyo kan Naga City Government asin Incident Management Team, binago an schedule kan nagkapirang aktibidad ngonian na aldaw para sa kasalbaduhan sa isasagibong prusisyon.
Poon alas 3:30 nin hapon sagkod alas 5:00 nin hapon, gigibohon an Misa Pontifical sa Metropolitan Cathedral.
An Foot Procession mapoon sa alas 6:30 nin banggi.
An duwang imahen piglalaoman na maabot sa Danlugan sa Tabuco Bridge mga alas 8:30 nin banggi.
Pag-abot nin alas 9:00 nin banggi, piglalaoman na nakasakay na sa Pagoda an duwang imahen para sa Fluvial Procession sa Naga River.
An paghali pasiring sa Hawasan sa Basilica Minore of Our Lady of Peñafrancia, kun saen ibabalik an mga imahen, piglalaoman na maabot nin mga sarong oras may kabangang oras.
Poco mas o menos alas 11:00 nin banggi, piglalaoman na gigibohon an Misa sa Minor Basilica of Our Lady of Peñafrancia and National Shrine.
Mientrastanto, pinapagirumduman an publiko na maging disiplinado asin magsunod sa mga ipinapaotob na patakaran asin pagbabago sa schedule ngonian na pagkakataon, nin huli ta an Fluvial Procession gigibohon sa banggi sa kaenot-enote.
