Pinagtibay kan Kamara sa ikatulo asin pinal na pagbasa an House Bill (HB) No. 9532 o Universal Access to Digital Academic Learning Resources Act na matao nin libreng high-speed Wi-Fi asin digital textbooks sa mga estudyante sa pampubliko asin pribadong kolehiyo.
Segun kay Speaker Faustino “Bojie” Dy III, katuyuhan kan panukala na tugunan an dae pantay na access sa learning materials asin matatag na internet connection.
Sa botong 202 na pabor, mayung nagtutol asin mayung abstain, ipinasa an HB 9532 na mag iimplementar nin National Academic Content Repository (NACR) sa irarom kan Commission on Higher Education (CHED), katuwang an Department of Information and Communications Technology (DICT) asin iba pang HEIs.
Sa NACR, libre an online access sa digital textbooks, lecture videos, syllabi, research papers asin iba pang open educational resources. Mandato din kan panukala an pagkakaigwa nin high-speed Wi-Fi para sa mga estudyante asin faculty, na tatawang prayoridad an mga rural asin kulang sa resources na scampuses.
