Target kan House Committee on Justice na magpoon nin full hearing pagkatapos kan Semana Santa para madetermina kun may probable cause an duwang verified impeachment complaints laban ki Bise Presidente Sara Duterte.
Segun sa Chairperson kan Committee na si Batangas Representative Gerville Luistro, posibleng matapos ninda an hearing sa laog nin duwang bulan.
Nabanggit ni Luistro na magiging mini-trial ini huli ta ipipresentar an mga testigo, affidavit o sworn statement, dokumento asin iba pang ebidensya para sa mga alegasyon laban ki Vice President Sara na nakalaog sa Impeachment Complaints.
Piglinaw ni Luistro na dae man kaipuhan na mag-atendir sa hearing an ikaduwang presidente.
Nagtutubod si Bicol Saro Party-list Representative Terry Ridon na dae makakaabot sa sine die adjournment sa Hunyo an impeachment proceedings huli ta kinakaipuhan na matapos ini sa laog nin 60 session days.
Huli digdi, sinabi ni Ridon na posibleng sa Mayo, maboboto na sa committee level an impeachment na susundan kan pagsakat kaini sa plenaryo.
Sinabi pa ni Luistro na yaon ngonian sa step three of five an House Committee on Justice kun saen an gabos na dokumento yaon sa motion huli ta an reclamador asin depensa an mabariwas nin pleadings.
Ipinaabot na kan Justice panel an abiso sa Opisina kan Bise Presidente.
Kun magsimbag si Vice President Duterte sa laog nin sampulong aldaw, tatawan nin kopya an mga nagreklamo tanganing maka-file nin simbag sa laog nin tolong aldaw.
Si Duterte tatawan man nin kopya kan saindang reply asin igwa nin tolong aldaw tanganing mag-file nin rejoinder.
