Piglalaoman ni Senate President Sherwin Gatchalian na maatinder an gabos na senador, kabali na an mga miyembro kan minorya, sa pagpoon kan impeachment trial ni Vice President Sara Duterte ngunyan na aldaw, huli ta parte ini kan saindang obligasyon bilang mga senator-judges.
Sa sarong intrevista, sinabi ni Gatchalian na mahalagang personal na madangong kan kada senador an mga ebidensya asin argumento na ihahampang kan nagkapirang panig tanganing lubos sindang makapartisipar sa pagdangog.
Dugang pa kan Senate President, puwede man maghapot an mga senador sa mga testigo, pati na sa prosecution asin defense panels, mantang ginagibo an paglilitis. Alagad tinawan-doon ni Gatchalian na dai dapat gamiton an impeachment court komo forum tanganing pag-urulayan an ibang mga isyu, kabali na an legal na usapin na katakod sa saiyang pagkahalal bilang Senate President.
Magigirumduman na enot ng sinabi ni Senate Minority Leader Alan Peter Cayetano na posibleng malagay sa alanganin na pagorolay an pagiging patas kan impeachment trial mantang dai pa nareresolbar kan Supreme Court of the Philippines an saiyang petisyon na ipawalang-bisa an sesyon kan Senado kan Hunyo 3, kun sain nahalal si Gatchalian bilang Senate President.
Alagad para ki Gatchalian, an usapin sa liderato kan Senado dapat pag-urulayan sa plenaryo bilang parte kan legislative functions kan Senado, asin bako sa impeachment court.
Mientrastanto, nagtuyubod man an senador na positibong senyales an pag-atinder nina Senators Loren Legarda asin Robin Padilla sa all-senator caucus kan Biyernes, huli ipinapahiling kaini na preparado na an kadaklan na senador na isantabi an orolay sa liderato asin mag-pokus sa Impeachment Trial.
Tinawan doonnpankaini na mahalagang magkaigwa nin quorum tanganing magpadagos an pagdangog, maski dai makapag-atinder an gabos na 24 senador kada aldaw kan trial.
Ibinunyag man ni Gatchalian na may siring na mga miyembro kan minorya na nakipagkoordinar sa saiya tanganing ipaliwanag na dai sinda nakaatinder sa caucus huli sa mga naenot na nakatalaan na aktibidad asin iba pang importanteng obligasyon.
