Giant Sperm Whale, narescue sa isla sa Quezon
NAGA CITY- Narescue kan mga otoridad an sarong balyena na na-stranded sa baybayon kan Polillo island sa banwaan nin Patnanungan, Quezon.
Ini an kinumpirmar ni Nonie Enolva, tagapagtaram kan Bureau of Fisheries and Aquatic Resources (BFAR) Bicol sa entrevista kan Bombo Radyo Naga.
Sigon ki Enolva, sarong giant sperm whale an napadpad sa baybayon kan nasambitang isla.
Tulos man na nagkondusir nin maninigong aksyon an Municipal Agricultural Office kan nasambitang banwaan alagad naging problema suboot an kawaran nin mga ekipahe na makakapagdara sa balyena sa hararom na parte kan dagat huli sa kadakulaan kaini.
Apwera digdi, problema man sa pagrescue sa balyena an makusog na hukol nin dagat.
Sa ngonyan, padagos pang inaaram kan mga otoridad ano an posibleng rason kun tano bakit na-stranded an nasambitang giant sperm whale sa isla.
