Nagpasiklab tulos an Gilas Pilipinas kan madaog kaini an host na Qatar sa score na 74-71 come-from-behind win kan nakalihis na aldaw sa 2nd Doha Invitational Cup na pigkundisir sa Qatar University Sports and Events Complex.
Napairarom an Gilas Pilipinas sa 11 puntos sa huring kanto kan laban. Kaya man tulos na rumesponde an Pinoy squad.
Naglatag an Gilas nin 23-11 atake sa likod ninda Dwight Ramos, Justin Brownlee asin AJ Edu tangani makua an enot na trayumpo kaini.
Nangenot para sa Gilas si Dwight Ramos na kumana nin 15 puntos tampok an tulong three-pointers kaiba an duwang rebounds asin duwang assists.
Nagdugang man si eight-time PBA Most Valuable Player June Mar Fajardo nin 12 puntos, pitong boards asin duwang assists mantang naglista si Brownlee nin 10 puntos, limang rebounds asin limang assists.
Nag-ambag man si Scottie Thompson nin 10 puntos mantang nagpamati si Edu nin anom na puntos asin 10 boards.
Solido an opensa kan Gilas na nakakua pa nin pitong puntos asin limang rebounds gikan ki two-time UAAP MVP Kevin Quiambao na miyembro kan Goyang Sono Skygunners sa Korean Basketball League.
Bumandera para sa Qatar si naturalized player Tyler Harris na may 17 puntos gikan sa impresibong 8-of-10 shooting mantang nagsumiter man si Mike Lewis nin 15 markers.
Pirang oras sana an magigin pahingalo kan Gilas Pilipinas nin huli ta tulos ining masalang sa saindang ikaduwang kawat kotra sa Lebanon sa alas-6 nin pagkabanggi.
Naenot nang nadaog an Lebanon sa Egypt sa saindang enot na kawat sa iskor na 70-82.
