Pigdomina kan Gilas Pilipinas Youth sa pagbubukas kan kampanya kaini sa FIBA U16 Asia Cup SEABA Qualifiers an Vietnam makalihis tambakan sa skor na 113-62, mantang nadaog man kan koponan an Thailand sa sa skor na 87-42 sa Bren Z. Guiao Convention Center sa Pampanga.
Ini an enot na opisyal na kawat ni PBA legend LA Tenorio komo head coach kan national youth team.
Sa laban kan Gilas Youth kontra sa Vietnamn nagin dukot an laban sa enot na quarter sa skor na 29-20, dagusan nang nagarayo an Gilas sa second quarter asin nakapag kurit nin 61-33 halftime lead asin dae na nagpahabol pa.
Pinangenotan ni Travis Pascual an opensa kan Gilas na may ambag na 16 points, mantang nagdoble-doble si Prince Cariño sa saiyang 16 points asin 12 rebounds. Nag-ambag man nin 14 points si Jolo Pascual asin 10 points man gikan ki Jhustin Hallare.
Mientrastanto, para man sa laban kan Gilas Youth, dae nagsayang nin oras an koponan tanganing daogon man an Thailand kun saen, nakagibo nin 31-1 lead sa pagtatapos kan enot na quarter.
Nagibo kan Thailand na i-outscore an Gilas Youth sa second frame, 19-16, alagad an 31-point separation na ginibo kan Pilipinas sa enot na parte kan laban an sobra-sobra para madaog kan Thais orog na ta pigproteheran kan Gilas Youth an saindang dakulang double-digit na bentahe hasta sa huring buzzer.
Sa ikaduwang sunod na kawat, gabos kan 12 players na inilaog nii Tenorio an nabasag an scoring column, kung saen ipinahiling ni Carl Delos Reyes an dalan para sa Gilas Youth sa pagkakataong ini na igwa nin 16 puntos, kaiba an saiyang 9 na rebounds.
Igwa nin 2-0 record na ngunyan an Pilipinas asin masunod na hahampangon an Singapore atyan na pagkabaanggi sa kaparehong venue.
