Puntirya ni Gilas Pilipinas head coach Tim Cone na mapuonan an ensayo kan saiyang tropa sa Nobyembre 18 tangani pagpreparan an first window kan 2027 FIBA World Cup Asian Qualifiers.
Bastante na an 10 aldaw na ensayo antes na puonan kan Gilas Pilipinas an kampanya kaini sa World Cup qualifiers na maarangkada sa Nobyembre 28. Primerong makakalaban kan Gilas an Guam sa nasambitan ng petsa na ikukundusir sa Mangilao, Guam.
Ikukundusir man an ikaduwang paghahampang kan Gilas Pilipinas asin Guam sa Disyembre 1 na ikukundusir man sa Blue Eagle Gym sa laog kan Ateneo de Manila University sa Quezon City.
Ini an primerong pagkakataon na liwat mag iribahan an Gilas players makalihis an FIBA Asia Cup na pigkundusir sa Jeddah, Saudi Arabia. Posibleng magsanay an Gilas sa Blue Eagle Gym tangani magamay an mga ini sa venue na gagamiton sa aktuwal na kawat.
Saro man sa posibleng magin venue an training facility sa Inspire Sports Academy sa Calamba, Laguna na pirme nang ginagamit kan Gilas sa mga nakalihis na training camp kaini.
Nilalaomang makukumpleto an Gilas sa nasambitan ng petsa huli ta tinutugutan an mga overseas players na magbalik sa kani-kanyang nasyon tangani magkawat sa FIBA-sanctioned events.
Pangengenutan an pool ninda naturalized players Justin Brownlee asin Angelo Kouame kaiba si Quentin Millora-Brown na kansuarin sana an tinugutang magkawat kan FIBA komo local player.
Kaiba man sinda Japeth Aguilar, Scottie Thompson, RJ Abarrientos, June Mar Fajardo, CJ Perez, Calvin Oftana, Chris Newsome, Dwight Ramos, AJ Edu, Kevin Quiambao asin Carl Tamayo.
Dae man makakakawat si Kai Sotto na presente pang nasa rehabilitasyon tangani dagusang magparahay makalihis magsairarom sa operasyon huli sa ACL injury.
