Nagsayuma an gobyerno kan Australia na maging host country ki dating Presidente Rodrigo Duterte para sa saiyang interim release.
Marurumdoman, naenot ng sinaysay ni Vice President Sara Duterte sa entrevista kan media sa Melbourne kan magbisita an Bise Presidente duman, na nasa listahan kan mga nasyon an Australia na pigkokonsidera kan saiyang ama na magin host country para sa saiyang paramientras na pagkakalibre.
Sigun sa Bise Presidente, nagpromesa an Melbourne na matabang o tatanggapon kaini an dating presidente alagad dae na nagluwas pa nin dugang na mga detalye.
Aram man kan gobyerno kan Australia an petisyon kan dating presidente para sa interim release gikan sa detention center kan ICC sa The Hague, Netherlands.
Alagad dae na soboot ini nagtugot na mag-host sa dating Presidente asin dae na ini pigkonsiderar. Nahihiling man kan Australia an aplikasyon kan dating presidente para sa provisional release komo sarong usapin na dapat ikonsiderar kan ICC sa irarom kan Rome Statute, an founding treaty kan korte kun saen member state man an Australia.
Enot na digdi, sa petisyon na pigsunad para sa interim release kan dating Presidente kan Hunyo 12, kinumpirmar kan defense team kaini na nagpahayag nin kapreparadohan an sarong nasyon tanganing akuon an dating presidente sa panahon kan saiyang interim release asin pigpautob an mga kondisyon para sa saiyang pagkakalibre.
Alagad an pangaran kan nasyon an redacted o dae pigbali sa dokumento.
