Pigtawan duon kan grupo kan mga abugado na Free Legal Assistance Group na mayong legal conflict sa pag-ultanan kan impeachment complaint asin man criminal cases na presenteng kinakaatubang ni VP Sara Duterte.
Marurumdumang nagsunad an National Bureau of Investigation (NBI) nin criminal cases kontra ki VP Sara huli ta naenot na kaining pag-amin na may nakaulay na ining magadan ki PBBM, First Lady Liza Araneta-Marcos, asin man House Speaker Martin Romualdez, sa oras na ini soboot ay pagadanonan man.
Ini an sa ibong pa kan impeachment complaint na pigsunad sa Kamara kun saen an pigbutasan kaining huma an saro man sa mga ginamit na basehan sa pigsunad na reklamo.
Susog ki Atty. Audi Bucoy kan Free Legal Assistance Group, an mga kasong pigsunad kan NBI an pawang criminal charges siring na sana kan inciting to sedition asin man grave threat. An mga ini an pagbalgar soboot sa Revised Penal Code kan nasyon.
Sa ibong na banda, an impeachment an sarong constitutional process na nakabase sa public accountability.
Ini an pagbabantay sa accountability o paninimbagan kan sarong public official. Hurot kan abogado, mayong ligal na problema sa sabay na pag-usad kan mga ini, orog na ta magkaibang korte man an malapot.
Enot nang pigtalaan kan Department of Justice (DOJ) an preliminary investigation sa criminal case na kinakaatubang kan Bise Presidente, sa Mayo 9 asin man Mayo-16.
Pinaglalaoman man na pupuonan na kan Senado an pagdangog sa impeachment case kontra ki VP Sara paglaog kan susunod na Kongreso.
An Senado an masirbing impeachment court na malitis sa impeachment case kan nasambitan ng Bise Presidente.
