NAGA CITY- Nakumpiskar an haros 100 na depektibong kilohan katakod kan pigkondusir na Oplan Timbangan sa Naga City People’s Mall (NCPM) siring man sa manlaen laeng pang mga establisimiento sa ciudad nin Naga.
Pinangenotan ni Market Enterprise Promotion Office (MEPO) Market Supervisor Nephtalie Pabines an nasambitang aktibidad na pigkondusir kan Task Force Timbangan.
Sa entrevista kan Bombo Radyo Naga ki Pabines, pigkokondusir suboot ninda an pag-inspeksyon sa gabos na kilohan nin mga negosyante partikularmente na sa mga merkado publiko.
Kabale man sa pigsasairarom sa maninigong inspeksyon an mga kilohan sa pawnshop, courier company asin sa mga sari-sari store.
Dugang pa niya, papakarhayon kan saindang ahensya an nakumpiskar na haros 100 na mga depektibong kilohan antes na ibwelta sa mga negosyante.
Pigbugtakan man nin sticker an mga kilohan komo patotoo na nagsairarom na ini sa mahigot na inspeksyon kan Task Force Timbangan.
Napag-araman na duwang beses sa sarong taon pigsasagibo an Oplan Timbangan basado sa nakapalaman sa Republic Act No. 7394, the consumer act of the Philippines.
