NAGA CITY- Pangapodan pa nanggad kan Alliance of Concern Teachers (ACT) – National sa Bureau of Internal Revenue (BIR) na dae na kaini patawan nin buwis an mareresibeng honorarium kan mga public school teachers na nagtukaw komo miyembro kan electoral board sa katatapos pa sanang barangay asin Sangguniang Kabataan (SK) elections kan Mayo 14.
Sa entrevista kan Bombo Radyo Naga ki Benjamin Valbuena, ACT-National president, sinaysay kaini na antes pa an eleksyon, pinakiolayan na ninda an Commission on Election (Comelec) siring man an BIR na dae na patawan pa nin 5% tax an honorarium kan mga paratukdo alagad mayo suboot nagin lakdang digdi an komisyon.
Sigon ki Valbuena, dae pa nanggad nareresibe kan mga pratukdo an saindang P1,000 na travel allowance kasabay kan pagkua kan mga ini nin election paraphernalia.
Sa ngonyan, dae pa suboot nareresibe kan mga paratukdo an saindang travel allowance siring man an saindang honorarium urog na sa nagkapirang mga lugar sa National Capital Region (NCR), Central Luzon asin sa Southern Tagalog.
Napag-araman na makakaresibe nin P6,000 an nagtindog komo Chairman kan electoral board mantang P5,000 man sa mga miyembros kaini.
