Pormal nang nagsunad nin reklamong cyber libel sa National Bureau of Investigation (NBI) si Sen. Risa Hontiveros tanganing imbestigaran an mga nasa likod kan duwang video kan sarong Michael Maurillo alias “Rene”, na pigkokonsiderar kaining “dangerous lies”.
Kaiba ni Hontiveros an legal team sa pagpasiring sa NBI kan Miyerkules, Hulyo 2, tanganing maaraman an mga producer kan video asin iba pang vlogger na nagdugang man soboot nin kasinungalingan sa nasambitan ng video na ipinalakop sa social media.
Ini an mapadapit sa in-upload na 2 video sa Youtube asin Facebook kun saen si Maurillo an nagsabi na binayadan ini nin P1 milyon para sa gibo-gibong testimonya kontra ki Pastor Apollo Quiboloy, dating Presidente Rodrigo Duterte asin Vice-President Sara Duterte, sa Senate hearing on Women, Children, Family Relations and Gender Equality na pinamayohan ni Hontiveros.
Tinawan-duon kan senadora na an mga social media personalities an nagpapalakop kan nasambitan ng video nin mayong pagberipika sa katotoohan. Pigtukoy kaini sinda Trixie Cruz-Angeles asin Ahmed Paglinawan; Krizette “Kiffy” Chu; Rob Rances; Sass Rogando Sasot; Aeron Peña (alyas “Old School Pinoy”); Jay Sonza; Banat By 2.0; Tio Moreno; Wredel Esguerra; Joie Cruz; Ka Eric Celiz; asin Atty. Ranny Randolf B. Libayan kan BATASnatin.
Pigsumiter kan legal team ni Hontiveros sa NBI an supporting documentation, kabali an screenshots, links, asin digital evidence.
Hurot pa kan lehislador sa NBI na tukuyon an lokasyon ni Maurillo asin pagkakabistohan kan nasa likod kan Facebook account na “Pagtanggol Valiente”.
