Nairehistro kan Japan an pinakamainit na bulan nin Hulyo magpuon an record-keeping kan nakalihis na taong 1898, sigun sa report kan Japan Meteorological Agency kan nakalihis na Biyernes, Agosto 1 kasabay kan patanid kan mas matinding init sa mga maabot pang semana.
Sigun sa mga siyentipiko, an mas madalas asin man mas matinding heatwaves an epekto kan climate change na kawsa kan tao.
Naglangkaw nin 2.89°C an average temperature kan nasyon kan nakalihis na Hulyo kumparar sa karaniwang temperatura magpuon 1991 hasta 2020 na pinakahalangkaw sa historya.
Ikaduwang sunod na taon na man na nagrehistro nin record-breaking average temperature an nasambitan ng nasyon para sa bulang ini. Kan nakalihis na Hulyo 30, nairehistro man an pinakahalangkaw na temperatura sa historya kan Japan sa 41.2°C sa Hyogo.
Nilalaoman kan weather agency na mapadagos an matinding init sa bilog na nasyon sa masunod na bulan.
Nagbaba man an antas kan uran sa mahewas na parte kan Japan, asin ma sa mga rehiyong nakaatubang sa Sea of Japan sa hilaga, nairehistro an pinakahababang uran sa historya.
Tulong semana man na mas amay na nagtapos an tag-uran sa kanlurang Japan kumparar sa karaniwan. Nagpatanid man an mga eksperto, na apektado na magin an mga cherry blossoms kan Japan.
Mas amay na soboot ining mamumukadkad o kaya man dae na labing maburak huli sa kakulangan kan lipot sa taglagas asin taglamig na kaipuhan tangani puonan an pagbuburak.
Kan nakalihis man na taon, nairehistro an pinakahahabang panahon na mayong niyebe an tuktok kan Mount Fuji, na kadaklang nagkakaigwa nin snowcap sa primerong parte kan bulan nin Oktubre, alagad nag abot nin Nobyembre antes man ini naglataw.
