Liwat na bubukasan kan House Committee on Ethics an kaso kontra sa suspendidong representantes kan Cavite na si Rep. Francisco “Kiko” Barzaga sa Pebrero 3, 2026, sigun ki Committee Chairman JC Abalos.
Sinaysay ni Abalos na personal nang naihatod asin inako kan opisina ni Barzaga an abiso katakod kan pagdangog, asin piglalaoman an saiyang pag-atendir asin bilog na pakikipagtabangan sa liwat na pag-urulay kan kaso.
An liwat na pagbubukas kan kaso an alinsunod sa mosyong inaprubahan kan plenaryo kan Kamara, na pigsunad ni Deputy Majority Leader asin 1Rider Party-list Rep. Ramon Rodrigo Gutierrez makalihis an privilege speech ni Manila Rep. Rolando Valeriano.
Pigsierto ni Abalos na isasagibo an pagdangog nin mahigot na alinsunod sa mga panundonan kan Kamara asin igagalang an derechos ni Rep. Barzaga sa due process.
