Mayong script an House Infrastructure Committee tanganing iimbwelto si Senator Francis Chiz Escudero asin siisay man na Senador sa maanomalyang flood control project.
Sigun ki Committee Co-Chairman Rep. Terry Ridon, kun igwa sindang script, dapat sa enot na pagdangog pa sana pigsalang na tolos si Department of Public Works and Highways (DPWH) Undersecretary Roberto Bernardo tanganing banggiton kaini an detalyes kan mga transaksyon kaibahan si Maynard Ngu.
Pigsaysay pa ni Ridon, kun igwang script sinda an dapat pigsambit na tolos sa enot na hearing an mga pangaran kan mga senador na akusado ngunyan sa mga kickback sa flood control projects sa Bulacan na pinapatootohan kan mga dating opisyal ng DPWH na sinda Engr. Henry Alcantara asin Usec. Bernardo sa Senate Blue Ribbon Committee hearing.
Dugang pa ni Ridon,mayo man script sa pagbanggit kan campaign donation ni Centerways Construction and Development Inc. President Lawrence Lubiano ki Escudero kan taong 2022 na pighapot ni Akbayan Rep. Chel Diokno na sarong pigrerespetong abogado asin halangkaw an integridad sa mata kan publiko.
Pigtawan duon man ni Ridon, medyo makangirit asin dae katubod-tubod an pigsaysay ni Escudero na igwang script an House Infra Comm tanganing ibali ini sa isyu kan korapsyon sa flood control projects.
