NAGA CITY- Arestado an sarong incumbent barangay kagawad makalihis an pigkondusir na anti-illegal drug operations sa Baao, Camarines Sur alas-5:30 nin aga ngonyan na aldaw, Abril 25.
Sa entrevista kan Bombo Radyo Naga ki PC/Insp. Roselyn Vasquez, hepe kan PNP Baao, sinaysay kaini na nadakop an suspek na si Rolando Bengua, kagawad kan barangay San Jose sa lindong kan search warrant na pigserbe laban sa saiya.
Si Bengua an pigkokonsiderar komo an No. 1 High Value Target kan PNP Camarines Sur.
Sigon ki Vasquez, pighihiling pa ninda an posibilidad na an nasambitang barangay kagawad an supplier man nin iligal na droga sa saindang barangay asin sa iba pang lugar sa saindang banwaan.
Narekober sa harong ni Bengua an nagkapirang sachet na naglalaog nin pigtutubudang shabu.
Basado man sa impormasyon hale sa PNP Baao, tugang ni Bengua an notorious na drug pusher sa saindang banwaan na si Nimfa Sinfuego na enot naman na naarestar kan mga kapulisan kan nakaaging taon huli sa pagkakaimbwelto man sa transaksyon nin iligal na droga.
