Pig-enkaminar kan mga tagausig kan International Criminal Court (ICC) an mga hukom na dae itao an kahagadan ni dating Presidente Rodrigo Duterte na ipagpauktaba nin mayong deadline an kaso kontra ki Duterte.
Sigun sa sainda, bakong bastante an alegasyon kan matinding pagkawara kan memorya asin pagluya kan cognitive kaini tanganing sabihong dae na ini pwedeng maghampang sa paglilitis.
Sa isinunad na dokumento kan nakalihis na Setyembre 11, sinaysay kan ICC Office of the Prosecutor na bakong bastante an mga report kan mga defense team ni Duterte tanganing punduhon an proseso.
Plano man kan mga prosekusyon na magkua nin sadiri nindang medical expert tanganing matukoy kun igwang kakayanan ba talaga si Duterte na magpartisipar sa paglilitis.
Dugang pa ninda, an pagigin “fit to stand trial” an bakong basado sana sa pagkakaigwa nin helang kundi sa kakayanan kan akusado na intindihon an mga kaso kontra sa saiya, pag-adalan an ebidensiya, asin tawan nin direksiyon an saiyang abogado.
Pigtawan-duon kan prosekusyon na an pagkauktaba kan paglilitis an dapat limitado sana sa panahong kinakaipuhan para sa medikal na pagsusuri.
Mawot man nindang makumpleto an confirmation ofcharges hearing antes matapos an 2025. Mientrastanto, pighurot man kan kampo ni dating Presidente Duterte na dae na kaini kayang magsairarom sa paglilitis huli sa “cognitive impairment”.
Sigun sa abogado kaining si Nicholas Kaufman, dae na matandaan ni Duterte an mga importanteng impormasyon, pati an mga tawong hararani sa saiya, kun saen pati soboot an proseso kan kaso an dae na kaini masabutan.
Basado man sa mga report kan defense medical expert, kaibahan na an sarong neuropsychologist kan ICC, dae na soboot kayang magpartisipar ni Duterte sa anumang legal na pagdangog, asin pati an saiyang kamugtakan, piglalaomang dae na soboot mararahay.
Marurumdumang paramientras ipinagpauktaba kan Pre-Trial Chamber an dapat kudta ng pagdangog sa Setyembre 23 mantang pighahalat an desisyon dapit sa ulayan kan saiyang salud.
