Sinayumahan kan Pre-Trial Chamber kan International Criminal Court (ICC) an apelar kan legal na kampo ni dating Presidente Rodrigo Duterte na patawan nin excusal an duwang ICC judges na makapot sa saiyang kaso na may kinaraman sa crimes against humanity.
Sa sarong desisyon na may apat na dahon na iniluwas kan nakalihis na Mayo 6, ipinaliwanag kan chamber na an sarong judge sana man an pwedeng maghad na magpa-excuse sa ICC Presidency, asin dae pwedeng magsunad nin preemptive request an mga partido kan dating Presidente.
Binanggit sa desisyon na an ano man na kahagadan gikan sa mga partido para sa excusal kan duwang judges ay ”mayong wastong proseso.”
Nabatid na an apelar kan kampo ni Duterte, na pigsunad kan nakalihis na Mayo 1, ay naghagad nin partial excusal ki Judge Reine Adélaïde Sophie Alapini-Gansou asin man Judge María del Socorro Flores Liera huli sa posibleng pagkakaigwa soboot nin bias na paghiling dara kan saindang mga naenot na desisyon dapit sa parehong isyu sa kaso kan Pilipinas.
Kabali sa mga lakdang na pigsunad kan kampo ni Duterte an sarong “Defence Challenge with Respect to Jurisdiction” asin man an kahagadan para sa saiyang tulos na pagpapalaya.
Sigun sa mga abogado ni Duterte, dae nasunod an mga kondisyon tangani magamit an hurisdiksyon kan ICC kan tugutan an imbestigasyon kan nakalihis na Setyembre 15, 2021, nin huli ta nagbutas na an Pilipinas gikan sa Rome Statute kan Marso 2019.
Sa presente, nakakulong pa man si PRRD sa ICC sa The Hague, Netherlands, asin man nakatalaan an confirmation of charges kaini sa Setyembre 23, 2025.
An prosekusyon an nagpepreparar kan mga ebidensya para sa pagdangog, kabali na an duwang testigo, 16 na oras kan mga video, asin haros 9,000 dahon nin dokumento
