Nagpapadagos ngunyan na Lunes an impeachment trial kontra ki Vice President Sara Duterte, kun sain isinalang kan House prosecution panel an bagong testigo tanganing simbagan an mga hapot manungod sa mga sinasabing indibidwal na pinaglaanan kan confidential funds.
Ipinatawag kan prosekusyon sa witness stand si Philippine Statistics Authority (PSA) Assistant National Statistician Marizza Grande.
Ipinapaliwanag kan prosekusyon na kaiba an mga opisyal kan PSA sa mga testigo para sa alegasyon kan salang paggamit kan confidential funds, huli ta sinda an naggibo nin pag-adal na nagpapahiling na an mga pangaran na nakasurat sa acknowledgment receipts, arog ni Mary Grace Piattos, dai ipinangaki, dai nagpakasal, asin dai nagadan sa Pilipinas huli ta mayo sindang opisyal na rekord sa PSA.
Ipinapaliwanag pa ninda na sa paagi kaini, maipapahiling ninda na palsipikado asin imbento an mga nasabing indibidwal, na nagpapatunay na igwang nangyaring manipulasyon asin salang paggamit sa pondo kan banwaan.
Magtutok an testimonya ni Grande sa Article 1 kan impeachment case na nag-aakusa sa Bise Presidente nin pagbalga sa ley huli sa sistematikong salang paggamit asin bakong tama na liquidation kan confidential funds na nagkakahalaga nin P500 milyon sa Office of the Vice President (OVP) asin P112.5 milyon sa Department of Education (DepEd).
Asin manungod digdi, inaatasan man kan Senate impeachment court sinda Commission on Audit (COA) employee Bresilio Sabaldan, DepEd Assistant Secretary Sunshine Fajarda, asin Police Major Jovelyn Magay na magtestigo sa impeachment trial poon Setyembre 7 sagkod 9.
