NAGA CITY- Pigsaysay kan sarong abogado na kun hihilingon soboot an nakasaad sa Saligang batas, dae mausad an pigsunad na impeachment complaint kontra ki Presidente Ferdinand Bongbong Marcos Jr.
Sa entrevista kan Bombo Radyo Naga ki Atty. Michael Henry Yusingco, Political Analyst, Senior Research Fellow at the Ateneo Policy Center, sinaysay kaini na kun babasehan an mismong complaint dae ini mapasa sa sufficiency and substance test.
Boot sabihon an nakapalaog sa impeachment complaint an haros espekulasyon asin opinyon sana na dae nakabase sa alegation of facts.
Huli kaini, enkaso magigin strikto asin susunudon an rules na pigtakda kan Saligang batas asin House of Representative dapat na tolos maibasura an nasambitan ng impeachment complaint.
Alagad dae man pighahali kan abogado an posibilidad na magbago an dalagan kan usapin orog na ta sa Mababang Kapulungan nagkakaigwa nin kababalaghan partikular sa isyu kan pulitika.
Kun enkaso mag-iba an dalagan sa Mababang Kapulungan posible an pag-usad kan impeachment complaint.
Marurumduman, an nasambitan ng impeachment complaint an yaon na sa opisina ni Faustino “Bojie” De Guzman Dy III asin kun sususugon an enot nang kapahayagan kan opisyal inapod kaini na baseless an isyu.
Mientrastanto, pigpaliwanag pa ni Yusingco na huli ta an gabos na Presidente kan nasyon dae pwedeng kasuhan mantang nakatukaw pa kun kaya pigbugtak an impeachment sa Saligang Batas tanganing linigon an nasyon gikan sa bakong marhay na padalagan.
Sa ngunyan, naglalaom na sana si Yusingco na anuman an kahihitnan kan isyu, mag-iral pa man giraray an karahayan sa bilog na nasyon.
