NAGA CITY- Naarestrar kan Police Regional Office Bicol an kabilugang 86 indibidwal asin nakumpiskar an nasa 92 na mga badil sa haros limang bulan na pagpautob kan Commission on Elections (Comelec) gun ban puon Enero 12 hasta June 11.
Sigun ki PRO-5 Director Brig. Gen. Andre Dizon na an mga nakumpiskar na badil an kinababalihan kan nasa 82 saradit na badil, sarong light weapon, apat na improvised shotgun asin sumpak, 2 na replica na badil, tolong explosive ordnance, asin nasa 423 rounds kan ammunition.
Apwera digde, igwa man 238 na firearms an boluntad na pigsurender asin 371 an pigdeposito para sa safekeeping kan mga maysadiri.
Katakod kaini, an Masbate an nakapagrehistro nin halangkaw na numero kan naarestrar na igwang 23 na indibidwal pigsundan kan Camarines Sur na igwang 20, Albay na 17, Camarines Norte na igwang 15, Sorsogon na igwang siyam asin Naga City na igwang duwa.
Mantang an Catanduanes nagtitinir na incident-free na mayong naarestrar sa bilog na durasyon kan gun ban.
Pigsaysya ni Dizon na an mga naarestrar na indibidwal an mahahampang sa magkakanigong kapadusahan sa irarom kan Comelec Resolution 11067 asin Omnibus Election Code (Batas Pambansa 881).
Alagad depende pa soboot sa imbestigasyon orog na ta an ibang mga violators an posibleng mahampang sa Republic Act 10591 o an Comprehensive Law on Firearms and Ammunition, na nagpapataw nin mas magabat na penalty nin nasa 8 hasta 12 na taon kan pagkakakulong.
Mientrastanto, an PRO-5 an nagkundusir nin 34,075 checkpoints sa bilog na Rehiyon.
Sa ngunyan, pig-enkaminar na sana kaini an publiko na magtinir na vigilante asin ireport an mga kahina-hinala na aktibidad o impormasyon na igwang kinaaraman sa illegal possession kan badil.
