Pig-ako ni Department of Education (DepEd) Secretary Sonny Angara na may mga kakulangan sa pagpapautob kan Senior High School (SHS) curriculum sa ilarom kan K to 12 program, huli ta sinabi kaini na nasa Kongreso pa an desisyon kun ipapadagos ini o dae.
Katakod ini kan pagsunad ni Senate President Pro Tempore Jinggoy Estrada nin sarong propwestong ley na obhetong pakarhayon liwat an sistema kan edukasyon sa nasyon sa paagi kan pagtanggal kan SHS, nin huli ta dae pa kaini dagusang naipapautob an obheto na makakrear nin mga may kasanayan asin preparadong magtrabaho pagkatapos makagradwar.
Nasa 12 taon na makalihis maipasar an Republic Act No. 10533, o mas bistado komo Enhanced Basic Education Act of 2013.
Tinawan-duon pa ni Angara na may nakataga nang mga pagbabagong ipapautob an ahensya para sa SHS sa maabot na School Year 2025–2026, sa paagi kan pilot implementation kan binagong SHS curriculum.
Saro sa mga pinakaimportanteng pagbabago sa binagong curriculum iyo an pagbawas kan core subjects. Haros, 15 an core subjects kada semester; ngunyan, magiging lima na sana kada taon, tanganing matawan nin mas dakulang pansin an mga importanteng asignatura. Kabali sa mga core subjects na ipinaabot kan DepEd an; Effective Communication (Mabisang Komunikasyon); Life Skills; General Mathematics; General Science; asin Pag-aaral nin Kasaysayan asin Lipunang Pilipino.
Basado sa ahensya, an mga asignatura na dae na parte kan core subjects, tatawgon na sana nin mga “electives”, imbes na applied o specialized subjects.
