NAGA CITY – Tinawan- importansya kan pamayuhan kan Philippine Army an koordinasyon kan saindang lado sa mga lokal na gobierno, iba pang ahensya orog na sa komunidad.
Sa nagin paghampang sa mga kagawad kan media ni Major General Alberto Peñafiel, Commander kan 9th ID, Philippine Army, sinaysay kaini na sa pagkakaigwa nin marhay na koordinasyon kan lambang saro mas marekas na mapupuho an insurgency huli ta synchronized an saindang magigin paghiro.
Katakod kaini, liwat man na pig-enkaminar kan opisyal an mga natatada pang miembro kan makakawalang grupo na magsuko na huli ta dae man sinda pababayaan kan gobierno.
Pigtatawan soboot ninda an mga ini nin option sa kun ano an mawot nindang manggayari makalihis na magsuko siring kan mga skills sa TESDA asin iba pa. An mga kwalipikado man na magin sundalo an piggigibo nindang suldado.
Sa irarom man kan E-CLIP, pigtatawan sinda nin livelihood program, asin training. Enkaso man na kwalipikado sinda na makalaog sa iba pang trabaho sa mga ahensya kan gobierno, tatabangan man an mga ini tropa kan gobierno.
Pigmomonitor man ninda an mga nagin buhay kan mga ini enkaso nagin parte na sinda kan komunidad tanganing mahiling kun nagmarhay ba an saindang buhay makalihis na magsuko.
Sa ngunyan, an probinsya man kan Masbate an saindang pigtututukan huli ta nagtitinir na igwa nin presensya kan mga makakaliwang grupo sa nasambitan ng lugar, asin padagos man an saindang paglapigot tanganing dagusan na ining mapuho.
