NAGA CITY – Pigkundusir an inagurasyon asin pagtinta nin Memorandum of Understanding kan Balay Silangan reformation center sa Camaligan, Camarines Sur.
Sa entrevista kan Bombo Radyo Naga ki PMaj. Jayson Andres, Chief of Police kan Camaligan Municipal Police Station, sinaysay kaini na kan nakalihis na July 17, 2024, nagkaigwa kan nasambitan ng inagurasyon na pig-atenderan kan manlaen-laen na opisyales.
Sigun ki Andres, obheto soboot kan nasambitan ng programa an magtao nin intervention, counseling, asin livelihood program tanganing matabangan an mga drug offenders na magin productive asin magsunod liwat sa mga nag-iiral na ley sa nasyon.
Dugang pa kan opisyal, sa paagi kan Balay Silangan nagkakaigwa nin bagong harong an mga drug surrenderies asin magkaigwa nin re-integration tanganing liwat na magin parte kan komunidad.
Katakod pa kaini, nin huli ta pigrerekognisa an role kan pamilya sa ikaka-trayumpo kan nasambitan ng programa, an Balay Silangan pig-welcome an mga family members kan sarong indibidwal na yaon sa saindang pasilidad.
Nagtutubod an opisyal na sa siring na paagi liwat na magigin marhay an pananaw kan sarong tawo orog na an mga mawot na magbago kan saindang buhay.
Mientrastanto, pigheras pa kan opisyal na nagpapadagos an saindang kampanya kontra iligal na droga siringman sa mga kaso kan panlulugos sa saindang banwaan tanganing mas orog na mamatean kan publiko an presensiya kan mga kapulisan.
Sa ngunyan, padagos man an pag-ekaminar ni Andres sa publiko na likayan na maibwelto sa anuman na iligal na gibuhon tanganing makalikay sa alanganin na sitwasyon.
