Pigsierto kan Armed Forces of the Philippines (AFP) na mayong pighihiling na huma nin pag-atake gikan sa Iran laban sa Pilipinas, sa tahaw kan nag-oorog na tensyon sa Middle East. Segun ki Rear Admiral Roy Vincent Trinidad, tagapagtaram kan Philippine Navy, limitado sana sa mga 2,000 kilometros an abot kan missile system kan Iran. Sinabi niya na mga 7,500 kilometros an rayo kan Pilipinas sa Iran, kaya dae malinaw kun makakaabot ini sa Pilipinas.
Idinugang pa ni Trinidad na dawa an strategic US-UK military base na Diego Garcia sa Indian Ocean bako man na abot kan missile capability kan Iran.
Lininaw man kan AFP na an mga lugar na sakop kan Enhanced Defense Cooperation Agreement (EDCA) iyo an mga pasilidad na pagsasadiri kan Pilipinas asin bako an mga base militar kan Estados Unidos.
Ginagamit ini para sa humanitaryong tabang, pagresponde sa kalamidad, asin magkasararong mga pag-ensayo sa mga kaalyado na nasyon, asin bako bilang mga opensibong pag’atake.
Enot kaini, may mga bareta na an mga lugar kan EDCA pwedeng targeton kan Iran kun maggrabe an iriwal sa pag-ultanan kan Iran, Estados Unidos, asin Israel.
Alagad, makusog na sinabi kan AFP na sarong rehiyonal na isyu sa Middle East an presenteng iriwal asin dae imbwelto an Pilipinas bilang proxy sa iriwal.
Nangapudan an militar sa publiko na magdanay na kalmado, magin kritikal sa impormasyon, asin magsarig sana sa mga opisyal na pahayag kan gobyerno.
