NAGA CITY- Gadan an sarong high value target (HVT) na incumbent barangay kapitan mantang arestado man an duwang iba pa makalihis an pigkondusir na serye nin search warrant operations sa Baao, Camarines Sur.
Binisto an nagadan na si Arturo Besinio, kapitan kan barangay Sta Teresita sa nasambitang banwaan.
Sa entrevista kan Bombo Radyo Naga ki PC/Insp. Dario Sola, chief-of-police kan PNP Baao, sinaysay kaini na pigserbe kan mga otoridad an search warrant laban sa nasambitang barangay kapitan sa harong kaini.
Dae na suboot pigtawan pa nin pagkakataon ni Besinio na maipaliwanag kan mga otoridad an nasambitang search warrant huli naman ta naenot na ng magluwas nin calibre 45 badil an suspetsado.
Huli digdi, napiritan ng magpaputok nin badil an mga otoridad.
Tulos man na pigdalagan sa ospital si Besinio alagad pigdeklarar na ining dead on arrival kan mga doktor.
Mientrastanto, sigon ki Sola apwera ki Besinio, limang persona pa an pigserbehan ninda nin search warrant sa parehong barangay.
Duwa man suboot an naarestar kan mga otoridad mantang nagtitinir man na at-large an tolong iba pa.
Apwera sa mga iligal na droga, nakumpiskar man kan mga otoridad an mga pigtutubudang ingredients sa panggibo nin pampasabog.
