Posibleng magbaba pa sa 1.2 porsiyento o maglangkaw hasta sa 2.0 porsiyento an inflation kan nasyon ngunyan na Disyembre huli sa maraot na panahon asin matinding holiday demand, sigun sa Bangko Sentral ng Pilipinas (BSP).
Susog sa BSP, posibleng umangat an inflation gikan sa 1.5 porsiyento kan nakalihis na Nobyembre huri kan paglangkaw kan presyo kan pangenot na barakalon, orog na an pagkakan, makalihis maapektaran kan sunod-sunod na bagyo an produksyon asin suplay kan mga produkto.
Dugang sa mga salik na nagpapalangkaw kan presyo iyo an pagmahal kan mga produktong petrolyo asin liquefied petroleum gas (LPG). Kan nakalihis na Lunes, nagpautob liwat nin langkaw-presyo sa krudo kun saen naglangkaw nin P0.60 kada litro an diesel asin kerosene, mantang nagtitinir na dae nag hiro an presyo kan gasolina.
Sa kabilugan ngunyan na taon, nag abot na sa P20.50 kada litro an paglangkaw sa gasolina, P20.85 sa diesel asin P5.55 man sa kerosene. Sinaysay kan BSP na an mga pressure na ini an pwedeng bahagyang mabalanse kan pagbaba kan singil sa kuryente sa mga lugar na sakop kan Meralco asin posibleng pagluwag kan presyo kan nagkapirang produktong petrolyo.
Naenot nang inanunsyar kan Meralco an bawas-singil na 35.57 sentimos kada kilowatt-hour ngunyan na Disyembre, na katampad kan labi sa P71 na bawas sa bulanang bayadan kan sarong pamilyang nagkokonsumo nin 200 kilowatt-hour.
Sa huring meeting kan Monetary Board kan nakalihis na Disyembre 11, pigkarkulo kan BSP na mapakol sa 1.6 porsiyento an average inflation ngunyan na taon, bahagyang mas hababa sa naenot na proyeksiyong 1.7 porsiyento.
Nilalaoman man ining masakat sa 3.2 porsiyento sa 2026 antes liwat na magbaba sa 3.0 porsiyento sa 2027.
